Uwahi na ang tanan..

Usa ka babaye ang mi-konsulta sa mananambal tungod sa iyang problema.

Babaye: Dok, kada alas siyete sa buntag lagi kay malibang gyud ko!

Dok: Aw, maayo nuon, nagpasabot kana nga himsog ka. Unsa may problema?

Babaye: Mao lagi na dok kay alas otso naman gud ko makamata. Nangapigsat na!

Ingon usab usahay ang kinabuhi. Bisan pa man kun nasayod na kita sa posibleng linugdangan sa atong binuhatan apan mahilig kita sa unya-unya hangtud nga maglisud na kita pagsulbad sa problema tungod sa kaalanganin.

Pungko-Pungko

Bisan nagkutoy ang tiyan ug napasmo,

Mangahas gihapon kita sa pag-adto.

Niadtong dapit nga kita mangaon,

Sa mga kinaham ‘tang mga pagkaon.

Dayon lingkod sa mga bangko,

Mag alirong sa usa ka la mesa mopungko.

Ug sa dakong payong nga naglandong,

Sa mga lunos natong kaugalingon.

Sa mga plastic kita mokab-ot,

Ug sa mga kamot kini isul-ot.

Hala, ukay sa mga nagkalain-laing sud-an,

Gipadaylang sa plastic nga basket hilabihan kadaghan.

Ginabot, tambok, ngohiong nga tag-as ug mugbo

Chorizo, atay, bola-bola ipares sa poso.

Utok sa baboy ug gagmayng nukos,

Makatagbaw sa atong tumang kalunos.

Mangagho tungod sa ka hang sa sawsawan nga suka,

Tungod sa siling kulikot nga naghugpa.

Tinagod-tagod nga sibuyas nga maka bungog,

Lawas, mainiton sama daw gisunog.

Ang pag subad sa maong mga sud-an,

Makapatagamtam sa kalami ug katagbawan.

Daw sama sa nakab-ot ang langit,

Ug ato kining ika pa ambit.

Drayber, propesyonal ug estudyante mohugop, maniodto,

Lain-laing matang sa tawo ang makig-sawo didto.

Kinaham, lamian apan barato nga pagkaon,

Sa pungko-pungko lang makit-an mga igsoon.