Sugilanon: One vs. one hundred
GOODBYE, love!’ ‘Bye, Honey!’ ‘Bye, sweetheart!’ ‘Bye, darling!’ ‘Bye, Babes…!’ Naglumba lag babay ang mga ‘asawa’ ni Butingting, nga nanagbarog sa dakong terasa sa iyang mansiyon, dihang misud na siya sa iyang Mercedes Benz aron moadto na sa iyang pabrika nga tighimog jumbo hotdog. Mao kiniy iyang negusyo nga natukod sukad makakubra sa pipila ka milyon ka pesos nga daog niya sa Superlotto usag tunga sa tuig ang milabay.
Tindero lag budbod nga way pilit kaniadto si Butingting. Nag-antos siya niini sulod sa napulo na ka tuig nga way maayong halin. Di pod lagi maayo ang iyang budbod. Tiaw mo ba goy way pilit kay wa siyay ikaabot og palit. Inig gisi mo sa giputos nga dahon sa saging, dayon lag pangayagyag sa yuta ug di ka makakaon sa imong pinalit.
Gibiaybiay siya sa mga tawo, labi na ang mga babaye nga moingon, “Ang budbod mo, Noy, pwerteng luspara. Way lana… lunok na lang, liwat sa nagbaligya!” Igo lang intawon si Butingting pagtulon sa iyang laway sa iyang nadawat nga biaybiay.
“Bantay lang mo, mga inday. Kadaog gani ko’s Superlotto ugma, ay…!” Nagpanakla nga namulong si Butingting dihang layo na ang mga seksi.
Nabatasan na ni Butingting nga bisan unsa ka gamay ang iyang halin, mogahin gayud siyag para sa iyang mentin nga numero sa Superlotto. Kay niya pa, suwerte-suwerte tuod ni, pero kon di ka mopalit… wa gyud kay suwerteng makuhit. Wa gyud kay purohan nga mamilyonaryo.
Pagka buntag sa sunod adlaw, Biyernes, mao na lay iyang naamguhan nga gikipatkipat niya ang iyang mga mata ug gikusi-kusi niyag maayo ang iyang nawong aron pagtino kon wa ba siya magdamgo sa iyang nakitang numero nga nidaog sa Superlotto nga iyang nabasahan sa unang panid sa Superbalita. Ang iyang mentin maoy niguwa.
Human madawat ni Butingting ang iyang premyo didto sa Manila wa siya maglangan. Miuli siya sa Cebu ug nagpatukod gilayon siyag mansiyon ug pabrika sa jumbo hotdog nga puwerte kabus-ok. Di sama sa iyang budbod kaniadto nga daling magupok. Mga dalagang guwapa ang iyang gipasulod nga mga trabahante sa iyang pabrika. Nagpaguwapo pod siya. Nagpa-spa. Mikaog mAayo ug mitumar og daghang bitamina. Mibata ug dato na kaayong tan-awon ang iyang hitsura.
Ang kapilyo ni Butingting nga wa niya magamit sa mga tsiks kaniadto gigamit na niya karon nga siya usa na ka milyonaryo. Gitiradahan niya ang iyang mga empleyadang guwapa. Gihashasan, gipilian og Binibining Pilipinas beauty gyud maoy iyang gipanguyaban. Gipapuyo sa iyang mansiyon nga maoy moalagad kaniya sama sa asawa. Usa ka gatos kini sila tanan nga nahimo niyang ‘asawa.’
KARON malipayon kaayong miuli si Butingting sa iyang mansiyon. Nakita niya ang mga daghang balloon ug dako nga streamer nga sineprahag “Happy birthday, our beloved, sweetheart, darling, baby, Honey Butingting!” Daghang lamiang pagkaon ang giandam sa iyang mga ‘asawa’ sa ibabaw sa lamesa duol sa dakong swimming pool. Seksi kaayo ang iyang mga asawa nga nagsul-ob lang og mga bikini. Nangaon silang tanan ug nanaghubog sa ‘stateside’ nga mga bino.
“Busog ug hubog na si Butingting, mga minahal kong asawa. Mopahulay na ko’s akong lawak…!” nagkanguhal si Butingting.
“Uy, akoa ra ba rong gabhiona, love. Ay’g binuang og tulog-tulog diretso diha!” Usa sa iyang asawa namulong nga naghapuhap sa iyang dughan.
“Apan di na nako madala, love. Ugma na lang, please!”
“Unsay ugma? Kang No. 51 nang turno. Imo na baya ming gi-eskidyulan.”
“Na hala, tana. Alalayi ko,” ni Butingting.
“Upppsss! Kamo ra diay? Di ra ba ko mahimutang kon di maromansa kon makainom…” laing asawa mikupot sa necktie ni Butingting.
“Ako sab, darling…” matod sa No. 55 nga mihinay pag-abli sa butones sa iyang long sleeve nga polo.
Nanugok pod ang uban pa niyang mga ‘asawa.’ Gitapuk-an siya sa usa ka gatos nga mga seksi ug guwapang babaye.
“Ayaw tawon mo pagbinuang mga pinangga…!” ni Butingting nga gipanguyawan na.
“Di tawon ni binuang amo, our dear Butingting,” gikan sa No. 69. “Mao gyud ra ba ni among giandam nga regalo nimo para karong gabhiona sa imong birthday!”
May mikupot sa siper sa karsones ni Butingting. Ang uban mitabang paglasnit sa gisul-ob nga mga sapot ni Butingting.
“H-Hoooy…! Mabayat kanang akong brip! Maluoy mo… ayaw intawon ko ninyo lugosa! Unsay pagtuo ninyo sa akong armas, machine gun!” mitiyabaw si Butingting nga nagkamangkamang. Nagkagidlay ang hitsura nga naghakgom sa iyang ‘pistola.’ (KATAPUSAN)
Courtesy of Sunstar SuperBalita
(Pebrero 21, 2008 isyu)